Aruparking kier enfatiza cu iParkMe por wordo download gratuitamente, es decir, no mester paga pa bahe riba celular na e appstore di preferencia di e cliente of riba website di Aruparking aruparking.com.

E app iParkMe lo facilita ora cu un persona por ehempel ta den un meeting, e ta comiendo of ta shop, e no mester bay bek te na un parkeermeter pa extende su tempo di parkeo. Ta trata di un servicio opcional, e cliente mes ta dicidi si e ta haci uzo di iParkMe of ta prefera di uza e otro opcionnan di pago manera ta e smartcard of cash na e parkeermeter mes.

Na momento cu haci uzo di iParkMe lo tin un costo di 3 Dollar pa luna y e suma aki ta cubri henter e luna, es decir por haci uzo di e app 1, 2, 3 of cuanto biaha cu e usuario tin mester. E 3 Dollar aki ta pa cubri e servicio cu e compania ta provee, es decir, e no lo bay pa Aruparking. E compania a ofrece e prome 2 lunanan gratis pa asina e usuarionan siña conoce e servicio di iParkMe y despues uze na momento cu nan desea.

Aruparking a tuma e decision di bay cu e opcion aki despues di a compara e diferente opcionnan. Na Hulanda por ehempel, mester paga pa e app y tambe pa e sms cu ta wordo manda y na Merca tin diferente unda cu e cliente mester paga pa transaccion di entre otro 35 cent di Dollar cada biaha cu haci uzo di e app, cual lo sali hopi mas costoso cu e 3 Dollar pa uzo ilimita pa luna.
Durante e prome dos lunanan di servicio di iParkMe Aruparking lo evalua e posibilidad cu por ehempel si uza mas di X cantidad pa luna lo no mester paga e tarifa di 3 Dollar of algun otro incentivo, buscando asina e mihor manera pa sigui eleva e servicio cu nos ta brinda na usarionan.
Otro siman Aruparking lo ta presentando mas informacion cu sigur lo ta na beneficio di tur esnan cu ta bishita centro di ciudad.