Aruparking lo sigui controla autonan mal par ate cu 7or di anochi,

Aruparking ta anucia cu lo bin algun cambio den e orario di funcionamento di parkeo paga den centro di ciudad. E cambio aki ta bin despues cu den luna di juli riba peticion di tanto Prome Minister Mike Eman y e tempo ey Minister Otmar Oduber a realiza un serie di ahustacionnan pa fomenta e fluho di hende den nos centro di ciudad.

Asina a reduci e tarifa na 2 Florin pa 2 ora y riba diasabra 2 Florin pa 3 ora; a introduci parkeo gratis pa 3 ora na e parkeerplaats patras di Botica Oduber y na esun di e stacion di Arubus. A elimina e parkeo paga di 7or di mainta pa 9or di mainta, a introduci e app iParkMe y a socializa mas ainda e pago di parkeo pa luna (vaknan geel).

Dialuna despues cu Prome Minister Eman a anuncia cu el lo kier bin cu mas cambio den Aruparking, Director Teo Croes a reuni hunto cune y otro mandatarionan pa repasa e posibilidadnan pa haci esaki. Asina a yega na diferente acuerdonan cu lo drenta na vigor entrante dialuna 14 di november proximo.

Orario di funcionamento di parkeo paga lo ta te 3or di atardi. Es decir lo reduci e orario cu 4 ora bahando e ora di 7or di anochi pa 3 or di atardi. Parkeo paga lo ta den funcion di 9or di mainta pa 3or di atardi.

Mester tene na cuenta si cu lo sigui controla tur auto cu parkeer malo, por ehempel para riba acera of paga cu un skina y tambe cu ta para den vaknan geel te cu 7or di anochi. Cu otro palabra, parkeo gratis den vaknan blanco lo ta gratis for di 3or di atardi, pero lo sigui controla esnan cu ta parkeer fout te 7or di anochi.

Tambe a tuma e decision cu lo biaha pa New York pa reuni cu un experto den transporte publico pa mira e diferente posibilidadnan cu por tin pa cobra boet en bes di uza e klem pa cu esaki. Esaki ten a e momentonan aki ta keda un alternativa, pero mientras tanto lo continua cu uzo di klemnan como e manera pa cobra boet.

Aruparking ta spera cu a traves di e ahustacionnan aki lo por contribui na tin un mayor fluho di personanan den centro di ciudad y continua cu nos meta inicial cual ta trece ordo den parkeo y seguridad pa tur hende.