Aruparking y comerciantenan a uni pa promove shopping den centro di ciudad

Aruparking y comerciantenan a uni pa promove shopping den centro di ciudad

Aruparking y comerciantenan a uni pa promove shopping den centro di ciudad. Aruparking ta inicia diabierna awor dia 1 di juli su campaña di Back to School cu lo dura te cu fin di augustus.

ARU_OJ_28_W, July-Aug 2016

E biaha aki Aruparking a uni forza cu comerciantenan den caya pa asina conhuntamente por ofrece e clientenan algo special. A acerca tur tienda den e zona cu Aruparking ta opera pa forma parti di e campaña y varios a reacciona positivamente pa cu esaki.
E campaña ta inicia diabierna cu e comerciantenan cu a confirma nan participacion, pero esey no kiermen cu esnan cu ta studiando e posiblidad ainda no por uni na e campaña. Na cualkier momento nan por join y asina promove shopping den Caya Grandi.
Tur tienda cu ta participa lo ricibi un sticker specialmente diseña pa e campaña aki pa e clientenan por identifica esnan cu ta participando.

Ta asina cu pa cada compra di 35 Florin e cliente lo ricibi 1 Florin di descuento, es decir, lo mester paga 34 Florin. Pa cada compra di 50 Florin e cliente lo ricibi 2 Florin descuento, pagando 48 Florin. Pa compranan di 100 Florin of mas na e tiendanan participante, e cliente lo por pasa cu e recibo na Aruparking y lo ricibi completamente gratis un smart card cu 10 Florin riba dje pa por uze durante su siguiente bishitanan den caya.

Aruparking ta wak cu di e forma aki conhuntamente cu comercio por promociona Caya Betico Croes pa cada bes mas hende por yega y sostene comercio local. “E no ta algo cu por wordo logra trahando independiente of bringando otro, si kier logra un mihor desaroyo positivo di nos Caya Grandi, nos mester uni, sostene otro y traha cu e mesun meta nos dilanti”, Director Teo Croes a duna di conoce.

Otro siman conhuntamente cu inicio di funcionamento di e app iParkMe lo bin cu mas informacion importante relaciona cu e servicio y calidad cu Aruparking ta sigui promove pa su usuarionan.

Leave a Reply

Your email address will not be published. Required fields are marked *